KULTUUR

Kunstefeesdeelname

Hierdie jaar se Kunsfees was omtrent ’n hoogtepunt op Kollegepark se kultuurkalender. Ons het gedigte opgesê dat die spoeg spat en daar is selfs ’n paar brawe leerders wat die gehoor met hul stemme en instrumente bekoor het. Om nie eens te praat van ons eie Picasso’s en Da Vinci’s nie.

Ons spreekkore was ook voortreflik, soos altyd, en het hierdie jaar vir ons drie belangrike lesse geleer:

Dit is ’n slegte idee om jou eie haarkapper te probeer wees en selfs ’n slegter idee om jou maatjie, wat kamstig jare lank al haar eie hare doen, te vertrou.
Whatsapp is nie gemaak vir skinderstories nie, tensy jy wil skaamkry.
En selfs graad 6’e en 7’s is nog bang vir die monsters wat met rooi oë, drilwange en loopneuse onder hul beddens wegkruip.

By die Vaaldriehoek Kunsfees alleen, het ons skool met meer as ’n honderd A++’e weggestap en die Vereeniging Kunsfees het nét soveel positiewe terugvoer opgelewer. Een ding is verseker: Die ‘K-’ in Kollegepark staan vir ‘kook’, want ons leerders wéét hoe!

Koor

Ons skoolkoor het ook aan die kunsfees deelgeneem en A en A+ verdien. Die hoogtepunt van die koorkalender was die Foyer Produksie, waar ons saam met Leah en ‘n paar ander skole opgetree het.

Redenaars

Redenaars 2023 en ons kon nie die monde van die sprekers snoer nie. Die oorredings woorde het die jaar uit hulle monde gevloei en elke kompetisie was so lekker soos braaivleis met pap en sous. Om jou sê te sê voor baie mense verg beslis mannemoed en ons deelnemers het soos ware bytjies hulle staal gewys.

Ons spog met leerders wat uitsonderlik presteer het by die onderskeie kompetisies:

Super 12: Linden le Roux (gr.3) dring deur na die finale rondte.

ATKV: Charl du Preez (gr.2), Emma de Clercq (gr.3), Marike Wilken (gr.6) en Yolané Botha (gr.7) dring deur na die semifinale rondte.

Oppie Tong Af: Linden le Roux (gr.3) dring deur na die Nasionale Finaal.

Radikale Redenaars: Marike Wilken (gr.6) en Abigail Pienaar (gr. 7) dring deur na die Gauteng streeksfinaal.

Kollegepark is in veilige hande met ons oulike redenaars. Hulle denke, moed om hul sê te sê en bereidheid om deel te neem, gee ons die vertroue dat ons toekoms in redenaars veilig is. Hulle sal vir seker nie eendag met ‘n mond vol tande staan as ons hulle nodig het nie.

Bybelvasvra

Is jy dapper? Hou jy van leer? WAAAAAAT?! Dan is Bybelvasvra jou ding!

Hier is ons Bybelvasvraespan vir 2023.

Dansgroepe

Die dansgroep het hierdie jaar by vele geleenthede opgetree. Hulle het onder andere by die Vaal Triangle of Performing arts deelgeneem en ‘n Diploma verwerf.

Revue / Konsert / Kunsuitstalling

In 2022 bring ons ‘n prag revue op die planke. ‘Peterpan’ was voorwaar ‘n treffer en elke leerder het die geleentheid ontvang om hul harte uit te speel.

Ons het ons 45-jarige bestaansjaar met ‘n baie suksesvolle revue ‘Peterpan’ afgesluit.

Pom-poms

Ontmoet ons skool se Pom-Poms van 2023.

Hierdie besige bytjies is Laerskool Kollegepark se grootste ondersteuners. Ons span bestaan uit Gr. 1 – 3 dogters. Hulle het al by verskeie geleenthede opgetree hierdie jaar waar hulle ons vermaak het in hulle kenmerkende uniforms.

VCSV

Dit is maklik om van die mooi te vergeet. Dit wat God vir ons gegee het en daagliks gee. Ons lewens word omgedompel en ons wentel alweer om die bose. As God jou gekies het om SY lig te laat skyn, sal jy dit laat skyn? Of sal jy versuip? Die VCSV se mikpunt was hierdie jaar om die kinders wat bereidwillig is om dit by te woon, ‘n plek te gee waar daar klein bietjie minder swaartekrag is. Ons het op Woensdae ons bes probeer om vir die leerders geestelike padkos te gee vir die week. Met die hulp van Pastoor Petrus Herbst het ons interessante lesse aangebied wat van graad 1 tot 7 die leerders iets gegee het om oor na te dink. Deur die jaar het daar ‘n lojale groep kinders na elke VCSV-byeenkoms toe gekom. Die leerders het die waarde daarin raakgesien om hul geestelik te verryk. Ek sien uit na die toekoms van Kollegepark se VCSV. Hierdie generasie wat vasgevang is in negatiwiteit gaan die generasie wees wat lig en hoop bring. Hierdie generasie maak Jesus ‘n realiteit.

Ons het die jaar afgesluit met ‘n VCSV- kamp by Kainos. Dit was nou sports van nagmars tot waterspele. Juffrou Du Preez, Juffrou Laubscher en Juffrou Ackerman moes pleisters plak en wonde skoonmaak soos die kinders hul knieë oopgeval het. Leerders het tot na middernag wakker gebly en by reuse kampvure oor Jesus gesels en vir Hom gesing. Die sessies tussen die aktiwiteite het die leerders beklee met hemelse waarheid. Definitief die hoogtepunt van die VCSV hierdie jaar. Ek is reg vir die ultimate frisbee “rematch”. As ek jy was, sal ek nou al my plek in volgende jaar se kamp bespreek.

Op die ou einde van die dag is God die middelpunt van jou bestaan… ELKE traan, ELKE lag, ELKE stofkorreltjie, ELKE druppel van jou DNA. Maak nie saak waar jou prioriteite lê nie, God bly steeds die middelpunt. Kom ons haal ons brille af, maak dit bietjie skoon en plaas weer ons fokus op dit wat saak maak. As jy Hom soek, sal jy Hom kry.