Sport

Atletiek 2023

Don’t think about the start of the race, think about the ending – Usain Bolt

Op julle merke…gereed… gaan! Die atletiekseisoen het met ‘n spoed afgeskop en ons atlete het weereens bewys dat aanhouers wen, deur nie net hul eie tye en afstande te verbeter nie, maar ook vele prestasies vir die skool te verwerf.

Verskeie atlete het die skool verteenwoordig by die Super 12-byeenkoms te Potchefstroom op 22 Oktober 2022.  Atlete het met groot ywer en deursettingsvermoë deelgeneem. Peter Motoedi het tydens die 60- en 80m-wedlope ‘n brons medalje verwerf en Super 12 was uiteindelik goeie voorbereiding vir die seisoen wat nog voorlê.

Met die jaarlikse Huissport was Kollegepark se veld prentjiemooi, stampvol atlete geklee in wit, geel, groen en rooi om die bokspanne te verteenwoordig.  Dit is ook hier waar die atletiekspan saamgestel is, wat sou voortgaan om die skool by vyf vriendskaplike byeenkomste te verteenwoordig.

Die Aflosaand het ook gesorg vir hoendervleis oomblikke en ons spanne het gewoeker om die stokkie oor te gee. Verder het ons atlete die geleentheid gehad om op 15 Februarie aan die Interlaer by Carel de Wet deel te neem, waar hulle die vrugte van hul harde werk gepluk het. 38 Atlete het hier deurgedring na die Distrikbyeenkoms.

Uiteindelik het vyftien atlete gekwalifiseer om die Sedibeng-Wes Distrik by Gauteng te verteenwoordig.  Albei dae het gesorg vir goeie atletiek en sterk kompetisie.  Joané Botha kwalifiseer hier vir Gewigstoot en neem deel aan die Suid-Afrikaanse Kampioenskappe te Pietermaritzburg.  Sy behaal ‘n 13de plek by SA’s.

Laerskool Kollepark se atlete het beslis die wenstreep dopgehou en in die proses ook ons skool se naam hoog gehou.

2023 se vuurwarm rugby

2023 se rugbyseisoen was voorwaar weer soos Kollegepark dit ken,’n reuse sukses, behalwe vir so sy-stap of twee wat nie vir ons uitgewerk het nie.  Gelukkig is daar min waarvoor ons afrigters bang is.  Ons het ook vir Kollbee op die veld verwelkom waar hy pronk op ons splinternuwe paalbeskermers.  

Ons het die jaar afgeskop met vier klipharde opwarmingswedstryde wat sommer vinnig, vinnig die seuns se staal beproef het.  Dankie aan elke skool wat ons genooi het en wat hier by Laerskool Kollegepark kom kuier het. 

Die o. 11- en eerstespan het weereens die lang pad na Jubaweni aangedurf vir hul toer.  Bosveld-rugby bly maar net iets om te geniet en hierdie jaar was dit beslis kookwater rugby wat deur ons seuns tydens die toer gespeel is.

Kort na die vakansie is ons na Laerskool Mooirivier vir die eerste rondte van die Super 12- reeks.  Dit was ’n harde dag, twee wedstryde op een dag is nie vir sissies nie.  Net in die volgende week het ons by Camp Discovery aangemeld vir die finale rondte van die Super 12.  Baie geluk aan die o. 9 ‘Iron-man” spannetjie wat op die dag weggestap het met ’n 3de plek.  Julle hou Kollegepark se naam hoog.

Ons liga was beslis ’n hoogtepunt en hierdie jaar kon ons dit regkry om al vyf spanne te laat speel in die semi-finale.  Kollegepark se rugby is beslis besig om te groei en floreer.  Drie van die spanne is deur na die finale.  Ongelukkig het hulle vasgeval, maar ons weet elke afrigter  is slaggereed vir die nuwe seisoen en is klaar besig met Rassie-gehalte planne vir hul span.

Dankie aan elke ouer, afrigter en borg.  Sonder julle ondersteuning en bydstand sou niks moontlik gewees het  nie.  Julle moeite en motivering gaan nie ongesiens verby nie.

Nou ja!  Genoeg van 2023, want ons bye is reeds gereed om die 2024-seisoen in hulle byekorf met kraakvars taktiek en vaardighede aan te durf.

Mini Rugby 2023

Ons wil graag die ysters in die mini-rugbyspanne net so bietjie uitlig. Die manne is beslis nie ‘’bye’’ om sonder handskoene aan te pak nie. Hulle was tydens die hele seisoen onoorwonne. Welgedaan aan die afrigter en al die spanne.

Netbal 2023

Christi Beyers was deel van die Gauteng o. 13-netbalspan wat deelgeneem het aan die SASN Nasionale Kampioenskappe.

Hop-hop spinnekop, die bal het in die gat gehop…

Laerskool Kollegepark skop die netbalseisoen af met ‘n allemintige 10 netbalspanne. Die seisoen word afgesluit met 4 spanne wat as Sedibeng-wenners uit die stryd tree, waarvan die o. 12A-span deurdring na die Gauteng uitspeelwedstryde. Die o. 12-span het ‘n 14de plek behaal.

Mini Netbal 2023

Mini-sport is die begin van ons kinders se toekoms in sport

deur harde oefening, pret en plesier kan jy ’n ster word.

Ons ondersteun ander skole met groot jolyt

en op mini-dae speel ons spanne voluit.

Dankie aan al ons spelers, afrigters en ouers vir 2023 se seisoen!

Volgende jaar hoop ons elke kind gaan mini-sport wil doen.

Kriekettoer 2023

Hierdie jaar se kriekettoerusting was sommer al vroeg-vroeg afgestof vir die asemrowende 

Super – 12 toernooi wat weereens in Rustenburg plaasgevind het vir beide die Eerste krieketspan en die o. 11 A- krieketspan. Die krieketmanne van beide spanne het hard geveg om die wenner onder die belt te sit vir Laerskool Kollegepark. Daar was heelwat uitblinkspelers gewees tydens hierdie toernooi waar die sterkstes van die sterkstes deelgeneem het. Hier volg `n paar uitblinkers van die Eerste krieketspan.

Reinhard “ Renoster “ Verster het nie net vir een nie , nie net vir twee nie , maar vir DRIE AGTEREENVOLGENDE wedstryde 5 paaltjies laat kantel met sy goue linkerarm.

Justin “Jusie” Oberholster het ook in die openingswedstryd die manne langs die kant laat gons oor sy draaiballe wat ook 5 paaltjies laat ombuig het.

Tertius “Terrie” Steyn , die kaptein van die Eerste krieketspan het mooi leiding geneem en die voorbeeld gestel oor hoe om die kolf vas te hou in die middel van die blad. Hy het `n besonderse mooi 92* geslaan teen Constantiapark.

Die liga het afgeskop en al die Kollegeparkspanne het nie sleg gevaar nie. Ongelukkig kon geen span hierdie jaar `n trofee inpalm nie , maar daar is wel goeie lesse geleer , goeie sportmanskap was aan die orde van die dag gewees en goeie verhoudings is gebou. 

Ons sê baie geluk aan die volgende leerders wat in `n streekkrieketspan opgeneem is en hulle spanne sommer goed bygestaan het tydens die toernooi wat plaasgevind het vanaf 22 – 25 September.

Danelle Dreyer

Rossouw Toerien

Johanru Fourie

Marcel van Rooyen

Macky Mclaggan

Declyn Lala

Heinrich du Plessis

Reinhard Verster

Logan le Roux

Divan Dreyer

Juan Burger

Tertius Steyn

Jubaweni Hokkietoer (15 Junie – 18 Junie)

Die hokkieseisoen skop die jaar op ‘n hoogtepunt  af.  Ons o. 13A seuns- en dogtershokkiespanne vertrek na Jubaweni vir die jaarlikse hokkietoer. Die spelers het baie uitgesien na al die aktiwiteite en leer sommer heelwat nuwe “skills”. 

Super 12-Hokkie (21 Julie – 22 Julie)

Die spanne was hard aan die oefen tydens die vakansie, ter voorbereiding vir die Super 12-byeenkoms, waar daar 24 skole teen mekaar uitgespeel het. Dit was ‘n yskoue naweek propvol harde kompetisie, maar nie eers die koue kon ons Kollegeparkers onder kry nie. Ons dogters eindig hierdie jaar 9de en ons seuns deel ‘n gesamentlike 15de plek. 

Die meisies neem aan Laerskool Fonteine se hokkietoernooi deel, wat op Saterdag 29 Julie 2023 by Sasol Hoër plaasgevind het. Al ons meisies vaar baie goed en geniet die geleentheid om hul hokkievaardighede uit te oefen.

Hierdie seisoen was daar baie hokkietalent onder die seuns en kon ons ‘n o. 13B-seunshokkiespan saamstel. Hulle het die geleentheid gehad om saam met die 1ste spanne te speel. Die manne het goed gevaar.

‘n Seisoen van goeie sportmangees, nuwe vaardighede en harde werk kom tot ‘n einde. Ons is baie trots op al ons hokkiespanne! Hier volg die uitslae vir die D8 – Liga:

1. 13A-meisieshokkiespan: Derde plek o. 13A-seunshokkiespan: Derde plek
2. 13B-meisieshokkiespan: Gesamentlike eerste plek o. 11A-seunshokkiespan: Gesamentlike tweede plek
3. 11A-meisieshokkiespan: Vierde plek

Die tennisseisoen het hierdie jaar met groot entoesiasme afgeskop deurdat die tennisspelers rondomtalie gespeel het om aan die 0/11 en 0/13 span te kies. Op 17 Oktober skop die tennisliga af teen Volkskool. Die wedstryde gaan taai wees, maar ons tennisspelers het baie geleer en gegroei in hulle spel. Ons span is gekomplimenteer oor hul puik gedrag en sportmangees. Daarby het hulle spoggerig gelyk met hulle nuwe pette!

Landloop 2023

“When your legs can’t run anymore, run with your heart!”

Laerskool Kollegepark se landloopatlete het beslis die seisoen begin en geëindig met brawe harte en longe gevul met baie suurstof.  Dit was ‘n kort, maar besige seisoen.  Die hoogtepunt was beslis al die nuwe gesiggies wat begin deelneem het.

Die landloopatlete het aan twee ligabyeenkomste deelgeneem en ons was bevoorreg om ook ‘n span te stuur om aan die Distrikbyeenkoms deel te neem te Emerald Casino.  Vier van die atlete dring deur na die Gautengbyeenkoms te Hoërskool Suiderlig. Miané de Clercq spog met ‘n goue medalje en die prestasie om eerste in Gauteng te wees.  Sy verteenwoordig Gauteng by die Suid-Afrikaanse byeenkoms die laaste naweek in September.

Die Super 12-landloopbyeenkoms was prentjiemooi met die Voortrekkermonument in die agtergrond by die wegspring- en eindpunt. Al was ons atlete aan sterk kompetisie blootgestel, het hulle dit baie geniet en ons spog met twee brons medaljes vanaf Emma en Miané de Clercq.

Laerskool Kollegepark se landloopatlete het beslis groot harte, propvol goeie gesindhede en lang asems om die seisoen suksesvol af te sluit.

Bloed en sweet, hier en daar ‘n noodkreet, vra ons manne, hulle sal daarvan weet.
Skop hom doer, druk hom daar, ons reken sommer vinnig met ons opponent af en klaar.
Hierdie manne het geen spiere van papiere. Hulle woeker met baie talente.

Haai daar, slaaiblaar, sal jy vir my bedaar. Kyk daar, wie weet waar, daar maak ons weer met ‘n wen klaar.
Mooi rokkies, skoolsokkies, ons dames hop soos springbokkies. 1, 2, 3 en siedaar, ons maak elke keer met ‘n groot telling klaar. Doele word gegooi en Oupas en Oumas van oral af word genooi.

Hop–hop spinnekop, kry vir jou ‘n bal, ‘n stok en mik reguit vir die hok.
Saterdae word waterdae met uitputtende, harde hokkiedae. Ons klein soldaatjies is altyd op hulle plek, reg om nog oë te rek.
Met ‘n dribbel-dribbel hier en ‘n doel doel daar, is deursettingsvermoë en harte van staal, sowaar daar
.

Welgedaan aan elke sportster wat in 2022 met provinsiale kleure vereer is. Julle hou ons skool se naam hoog!

Jukskei 2023

Baie geluk aan die o. 13-NOORDVAAL JUKSKEI WENNERS!

‘n Geskiedkundige dag vir Sedibeng Jukskei.  Twee laerskoolspanne van Sedibeng het aan die Noordvaal toernooi in Pretoria deelgeneem.

Laerskool Kollegepark

SEUNS: EERSTE

MEISIES: SEWENDE

Heinrich du Plessis is gekies as een van die top vyf spelers.

Ons is trots op julle!