KULTUUR
Kunstefees
Soos met elke ander jaar, was die Kunstefees ’n hoogtepunt op Laerskool Kollegepark se kalender.
Ons het van Hollywood se “Royal Drama Bow”, profielspel en allerhande ander wenke in die dramawêreld geleer en kan nou enige gehoor betower. Ons spreekkore weet wat feetjies en kabouters eet en dat helde in sprokies nie eintlik vreeslik slim is nie. Hulle weet ook dat oupas beter hoor as wat ons dink, hulle het net ’n slim manier gevind om ma’s se gegil uit te doof.
Dit klink vir my of die kunstefees jou nogal ’n ding of twee leer, maar saam met dit kom daar ook baie lag, pret en plesier. Elkeen wat deelgeneem het, stap met herinneringe, trots en met meer selfvertroue weg. In my boekies is dit reeds ’n wen, maar dit kan seker nie skade doen om ook te spog met die feit dat ons hierdie jaar ’n 139 A++’e ingepalm het nie.
Een ding is vir seker en ek sal dit weer en weer verkondig: Laerskool Kollegepark se leerders stel nie teleur nie!
Ons skoolkoor het ook aan die kunsfees deelgeneem en A en A+ verdien. Die hoogtepunt van die koorkalender was die Foyer Produksie, waar ons saam met Leah en ‘n paar ander skole opgetree het.
REDENAARS 2024
Hierdie jaar het die babbelbytjies van Laerskool Kollegepark nie net hulle eie tonge aan die klap gehad nie, maar ook die van vele luisteraars wat nou nog klets oor hul uitmuntende prestasies. Ons redenaars het die skool verteenwoordig by die Super 12-, ATKV-, Oppie Tong Af- en Radikale Redenaarskompetisies. Deurdagte voorbereide en onvoorbereide redenering het hulle die podium gegee om die beoordelaars en gehoor te oortuig van hulle standpunt. Ons bytjies het van die hoogste podiums bestyg en goeie prestasies behaal.
Driné Smit (gr.3), Udia Grobler (gr.2), Lerieke Grobler (gr.4), Marike Wilken(gr.7) en Milan Brisley (gr. 7) dring deur na die semi-finale rondte van die ATKV-Redenaarskompetisie.
Udia Grobler behaal ook die uitsonderlike prestasie deur 3de te eindig in die landsfinaal van die ATKV-Redenaars kompetisie.
Soos die bekende Amerikaanse president Kennedy gesê het: “The only reason to give a speech is to change the world.” Ons redenaars het reeds elke luisteraar se perspektief oor die onderwerp verander, maar ons weet met hulle selfvertroue en hulle beredeneringsvermoë, hulle nes Kennedy sê, ook nog die wêreld kan verander.
By Laerskool Kollegepark is ons trots op ons redenaarbytjies.
Op 3 Augustus 2024 het ons jong Bybel-entoesiaste ‘n onvergeetlike reis na Polokwane aangepak vir ‘n opwindende Bybelvasvra-kompetisie. Die avontuur het om 4 uur die Vrydagmiddag begin, met almal wat op die bus gespring het, gereed vir pret en samesyn. Soos die wiele gerol het, het die gelag ook gerol, met grappies, stories en slaapsessies wat die lug gevul het. Dit was die soort rit waar die tyd verbygevlieg het, danksy die aansteeklike vreugde en goeie gees wat onder die groep geheers het.
Die kompetisie self was ‘n wonderlike ervaring. Die kinders, wat soveel moeite gedoen het gedurende die weke van voorbereiding, het regtig alles gegee. Hulle het vrae met selfvertroue beantwoord en hulle kennis van die Bybel gebruik terwyl hulle mekaar ook aangemoedig het. Dit was hartverblydend om te sien hoe hul opgewondenheid en passie geseëvier het.
Alhoewel die kompetisie moeilik was, was die ervaring wat opgedoen is, die belangrikste. Almal het weggestap, nie net met nuwe kennis nie, maar ook met ‘n hernieude liefde vir die Woord. Die tyd wat aan voorbereiding bestee is, het ons as ‘n groep nader aan mekaar gebring en ons begrip versterk.
Toe die gebeurtenis afgehandel is en ons terug huis toe gegaan het, was die gevoel van prestasie en kameraadskap onmiskenbaar. Dit het nie net oor die vasvra gegaan nie; dit het gegaan oor die herinneringe wat langs die pad gemaak is. Ons kan nie wag om dit alles weer volgende jaar te doen nie!
*Dansgroep Vier Uitsonderlike Prestasies!*
Ons dansgroep het onlangs ongelooflike suksesse behaal by verskeie kompetisies. By die *Con Spirito-kompetisie* het hulle ‘n merkwaardige *94%* behaal en is gekroon as *itemwenners. Hierdie prestasie het vir hulle ‘n uitnodiging na die gesogte **Forte-ronde* besorg, waar hulle weer uitblink met ‘n *94%* en weer as itemwenners geëindig het.
Die hoogtepunt van hul reis was by die *Con Spirito-prysuitdeling, waar die groep as **nasionale wenners* aangekondig is – ‘n enorme eer en erkenning vir hul harde werk en talent.
Verder het hulle ook hul vaardighede ten toon gestel by die *Vaal Triangle of Performing Arts, waar hulle ‘n **High Silver* toekenning ontvang het.
Baie geluk aan hierdie talentvolle groep dansers! Ons sien uit na wat die toekoms vir julle inhou!
Vanjaar se Pom-Poms groep het bestaan uit die “Mini” Pom-Poms wat leerders van Gr. RR en R bevat het, asook ons groep wat uit Gr. 1 – 3 leerders bestaan.
Die Pom-Poms het deur die jaar hul energie, talent en passie vir dans met elke optrede aan die gehoor oorgedra. Met vrolike danspassies en toertjies het die klomp talentvolle dansers nie net die harte van hul toeskouers gewen nie, maar ook die geleentheid aangegryp om selfvertroue op te bou en sterk spanwerkvaardighede te ontwikkel.
Elke optrede is gekenmerk deur hulle kleurvolle kostuums en vir seker die oulike faktor…wat “Ooohhh” en “Aaahhhh” onder toeskouers veroorsaak, die lewenslustige optredes wat die energie van die groepe weerspieël het, het baie harte aangeraak.
Ek is op my gelukkigste wanneer ons op Woensdae oggende VCSV en Praise en Worship kan doen. Dit is vreeslik pret om die Here te dien. Dit is vir my lekker as ons kan sing en dans. En as ons,ons oë kan sluit om met die Here te praat en vir Hom dankie te sê vir wat ons het en vir wat Hy vir ons doen. Dit is ook lekker as ons vir mekaar kan glimlag en as ons met dankbare harte kan sing. By die VCSV bring Juffrou of Meneer vir ons ‘n boodskap sodat ons dit ook met al ons maatjies kan deel. DANICA ENGELBRECHT:GR. 7M
Die VCSV is altyd ‘n plek om jou hart vir die Here te gee. Jy kan dans,spring en sing, niemand gaan jou dwing nie. Ek geniet dit vreelik, want niemand kan jou pla nie. Om meer van die Here te leer, voel jy sommer in beheer. Al SY wonderlike wonderwerke sal jy net by die VCSV kan leer! JANCI BEYERS: GR. 7S
Elke Woensdagoggend word ek met groot opgewondenheid wakker. Dan jaag ek my pa en my sussie aan om vinnig klaar te maak. “HOEKOM?” mag jy dalk vra. Wel…Dis VCSV! Elke week is daar ‘n ander onderwyser wat vir ons ‘n boodskap bring en ek het by elke onderwyser iets nuuts geleer! Hulle het my geleer om ‘n goeie verhouding met God op te bou, wat reg en verkeerd is en veel meer. VCSV is een van die dinge wat ek die meeste gaan mis! CARA VD MERWE: GR.7S
Wanneer ek VCSV toe gaan, dink ek aan die Here en wat HY alles vir ons doen. LAERSKOOL KOLLEGEPARK BYTJIES, ek wil julle aanmoedig om te gaan, want dit het my lewe verander en my nader aan die Here gebring. Ons prys nie net die Here nie, maar doen ook liefdadigheidswerk en deel bederfies uit aan minderbevoorregte maats. CASEY BEZUIDENHOUT: GR. 7M
Wat ‘n voorreg was dit nie om op ‘n Woensdagoggend bymekaar te kom en ons skool se VCSV by te woon nie! Bitter baie dankie aan Juffrou Minnaar en haar oulike span wat dit vir ons moontlik gemaak het. Dankie ook aan elke persoon se mooi les wat nog steeds in my hart vasgelê is. Ons sou dit ook nie kon doen sonder ons Hemelse Vader nie. Ons waardeer elke juffrou en meneer se moeite uiters baie! MILAN LOOTS: GR.7K
Ek is altyd so bly vir die geleentheid om die Here te kan prys saam met my maats. Die VCSV is my stiltetyd saam met die Here, wat ek soms nodig het in ‘n besige skoolweek. Die VCSV leer my om ‘n beter persoon te wees en bring my nader aan die Here. Die VCSV bring vir my blydskap en plaas ‘n glimlag op my gesig. Ek kry ook ‘n positiewe insig oor die lewe, wat soms moeilik is.
ERNÉ KAPP: GR. 7K
Daar is altyd hope pret en plesier by die VCSV! Vandat ons begin met liedjies sing totdat ons met gebed afsluit. By die VCSV kan jy net jou unieke self wees en ons leer ook hoe om ons probleme en goedjies waaroor ons stres in die Here se hande te los. Dit is opwindend om saam met my maats bymekaar te kom en meer oor die Here te leer en te gesels. My heel gunsteling deel by die VCSV is om liedjies te sing en die Here voluit te dien met alles wat ek het!
MILAN BRISLEY: GR. 7M
Kollegepark het weer hierdie jaar vir die eerste keer Mnr. en Mej. Kollegepark aangebied sedert 2019. Die aand was vol pret, glimlaggies en sprankel.
Ons wenners is as volg:
Mnr. Bytjie – David Konza (Gr. RR)
Mnr. Bytjie 1ste Prins – Anru Koegelenberg (Gr. 1)
Mnr. Bytjie 2de Prins – Britley Catsman (Gr. R)
Mej. Bytjie – Lianke Blom (Gr. 1)
Mej. Bytjie 1ste Prinses – Mini Mngomezule (Gr. 1)
Mej. Bytjie 2de Prinses – L’Chané Swanepoel (Gr. 1)
Mnr. Kollegepark Junior – Lindin le Roux (Gr. 3)
Mnr. Kollegepark Junior 1ste Prins – Juan de Beer (Gr. 3)
Mnr. Kollegepark Junior 2de Prins – Leomand Jacobs (Gr. 3)
Mej. Kollegepark Junior – Emma de Clercq (Gr. 3)
Mej. Kollegepark Junior 1ste Prinses – Isabel Collins (Gr. 4)
Mej. Kollegepark Junior 2de Prinses – Shelby Bester (Gr. 3)
Mnr. Kollegepark Senior – Logan le Roux (Gr. 6)
Mnr. Kollegepark Senior 1ste Prins – Wynand Bezuidenhout (Gr. 6)
Mnr. Kollegepark Senior 2de Prins – Tertius Steyn (Gr. 7)
Mej. Kollegepark Senior – Abigail Pienaar (Gr. 7)
Mej. Kollegepark Senior 1ste Prinses – Katelynn van der Walt (Gr. 7)
Mej. Kollegepark Senior 2de Prinses – Casey Bezuidenhout (Gr. 6)
